قلبى بيصرخ يا ميدان, انت سامعنى؟! قلبى بيصرخ من الخوف.. قلبى بيصرخ من الظلم و القهر و الاستبداد..قلبى بيصرخ على كل ام ابنها مات..قلبى بيصرخ من اللى حصل فى البنات..قلبى بصرخ من الالم و الاه و السكات.. قلبى بيصرخ, سامع يا ميدان؟! ياللى انت لكل ثائر عنوان..اللى ليك فى قلبى المجروح مكان..اللى انت بتكون دائما موجود وقت الهوان.. قلبى بيصرخ سامع يا ميدان..يا قلبى على وطنى ولهان و حبى ليها مالى كل الوجدان..مالى كل الكيان.. قلبى بيصرخ, سامع يا ميدان؟! قلبى بيصرخ نفسى اجيلك و اشكى همومى لنيلك اعيش جواك و تعيش جوايا..قلبى بيصرخ على مصابينك و شهدائك و احبائك..و كل واحد جالك..فى ارضك شفنا القهر و الخوف و الفرحة و الشوق..الشوق للحرية و الضوء..ضوء العزة و الشمس طلعة تلمع على سطح النيل و تسمعنا و احنا بنغنى مواويل ..قلبى بيصرخ على منظر الدبابة فى حضننا و ضابط الجيش وسطنا..اللى ديلوقتى بيدوس بجزمته على حلمنا..و لكن فاكر يا ميدان منظر الدبابة و الشبان و هتاف الكروان "الجيش و الشعب ايد واحدة".. انا فاكر يا ميدان و اياك تنسى فى يوم من الايام..قلبى بىصرخ يا ميدان من شوفة النار و الحرائق و قلبى اللى دايق طعم المر.. قلبى بيصرخ يا ميدان من اللى جاى و اللى فات و اللى كان.. ما اصل انت سامع قلبى من زمان, قلبى معاك هناك و فى كل خطوة سلام.. و انت كمان فى كل دقة من قلبى شغال: تطمنى مرة و المرة التانية تسيبوه طول اللىل شقيان..قلقان..يمكن منعنى عنك الاهل و الجيران و لكن اعرف ان حبى ليك بدون عنوان..المهم قلبى بىصرخ يا ميدان..اسمعه.. و ابقى انت بقى ادينى البيان. اصل قلبى بيصرخ والله يا ميدان..
ليست هناك تعليقات:
إرسال تعليق